Anëtari i Kryesisë së Aleancës, Durim Halilaj, ka kritikuar Qeverinë e Kosovës për menaxhimin e ekonomisë, duke e akuzuar për paraqitje të shifrave që, sipas tij, nuk pasqyrojnë gjendjen reale ekonomike dhe mirëqenien e qytetarëve.
Përmes një reagimi, Halilaj ka krahasuar buxhetin e vitit 2019, në vlerë prej 2.4 miliardë eurosh, me buxhetin aktual prej 4.27 miliardë eurosh. Ai ka thënë se, ndonëse në aspektin nominal buxheti është rritur për 78 për qind, pas përllogaritjes së inflacionit kumulativ prej rreth 38 për qind, rritja reale është afërsisht 29 për qind.
Sipas tij, buxheti aktual ka fuqi blerëse sa 3.09 miliardë euro të vitit 2019, ndërsa rritja ekonomike e projektuar mbetet në nivelin prej 3.3 deri në 3.6 për qind, bazuar në vlerësimet që ai ua atribuon Fondit Monetar Ndërkombëtar dhe Bankës Botërore.
Halilaj ka kritikuar edhe realizimin e investimeve kapitale, duke pretenduar se nga 750.9 milionë euro të planifikuara për nivelin qendror gjatë nëntë muajve të parë të vitit 2026, janë shpenzuar vetëm 225.5 milionë euro, apo rreth 30 për qind.
“Miliardat në letër nuk janë zhvillim ekonomik. Rritja e buxhetit nuk është e njëjtë me rritjen e mirëqenies”, ka deklaruar Halilaj.
Ai ka ngritur gjithashtu shqetësimin për projektet komunale, duke e akuzuar Qeverinë për mungesë të mbështetjes financiare ndaj pushtetit lokal dhe pengim të realizimit të projekteve infrastrukturore.
Sipas Halilajt, kjo situatë ka ndikuar në zvarritjen e projekteve që lidhen me furnizimin me ujë, ndërtimin e rrugëve dhe trotuareve nëpër komuna.
Në reagimin e tij, ai ka folur edhe për emigrimin, duke pretenduar se rreth 250 mijë qytetarë janë larguar nga Kosova gjatë mandatit aktual, për shkak të mungesës së investimeve, vendeve të reja të punës dhe perspektivës ekonomike.
“Kur nuk ka investime kapitale, kur nuk ka vende të reja pune dhe kur pushteti ofron vetëm propagandë, njerëzit ikin”, ka thënë ai.
Në përfundim të reagimit, Halilaj ka vlerësuar se rritja nominale e buxhetit nuk është përkthyer në përmirësim të mirëqenies së qytetarëve, duke e përmbyllur kritikën me deklaratën: “Kjo qeveri po e zbraz Kosovën!”
