Deputetja e Lidhjes Demokratike të Kosovës (LDK), Hykmete Bajrami, ka kritikuar gjendjen ekonomike në vend, pas miratimit të projektbuxhetit për vitin 2027, i cili kap vlerën prej 4.27 miliardë eurosh.
Përmes një postimi në Facebook, Bajrami ka theksuar se rritja e buxhetit dhe e Bruto Produktit Vendor në terma nominalë nuk nënkupton domosdoshmërisht përmirësim të mirëqenies së qytetarëve.
Sipas saj, që nga viti 2021, çmimet në Kosovë janë rritur për rreth 34 për qind, duke ndikuar drejtpërdrejt në fuqinë blerëse të qytetarëve.
Ajo ka theksuar se, ndonëse sot qytetarët mund të marrin më shumë euro, me to mund të blejnë shumë më pak sesa para pesë vitesh.
“Nga viti 2021 deri më sot, çmimet janë rritur rreth 34 për qind. Rritja e buxhetit dhe e Bruto Produktit Vendor në terma nominalë nuk e pasqyron realitetin ekonomik. Sot mund të marrim më shumë euro, por me to blejmë shumë më pak sesa në vitin 2021. Rritja e shifrave në letër nuk do të thotë domosdoshmërisht rritje e mirëqenies së qytetarëve”, ka shkruar Bajrami.
Deputetja e LDK-së ka përmendur edhe largimin e qytetarëve nga Kosova, duke pretenduar se rreth 250 mijë qytetarë e kanë lëshuar vendin që nga viti 2021.
“Fundja, sikur të kishte mirëqenie, nuk e kishin lëshuar vendin rreth 250 mijë qytetarë nga viti 2021”, ka përfunduar ajo.
Ndryshe, Qeveria e Kosovës ka miratuar projektbuxhetin për vitin 2027, që do të jetë 4.27 miliardë euro.
Siç bëhet e ditur, buxheti i paraparë i vitit të ardhshëm është 300 milionë euro më shumë se buxheti bazë i këtij viti.
Projektbuxheti është proceduar në Kuvend.
Gjatë prezantimit të projektbuxhetit, ministri i Financave, Hekuran Murati, ka bërë të ditur se rritja ekonomike për vitin 2027 parashihet të jetë 4.2 për qind, ndërsa të hyrat buxhetore për herë të parë pritet të tejkalojnë vlerën prej katër miliardë eurosh./teve1.info/
