Shefja e Grupit Parlamentar të Lëvizjes Vetëvendosje, Arbërie Nagavci në mbledhjen e Këshillit të Përgjithshëm të LVV-së ka folur për sfidat me të cilat po përballet vendi, duke veçuar rastin tragjik të vrasjes së Arlinda Zekajt.
Ajo ka thënë se ky rast kërkon reagim serioz institucional dhe angazhim të përbashkët për të parandaluar ngjarje të tilla.
“Vazhdojmë të përballemi me sfida serioze, siç është rasti tragjik i vrasjes së Arlinda Zekajt, krim që kërkon veprime urgjente e serioze institucionale, angazhim për adresimin e çdo veprimi apo mosveprimi institucional dhe angazhim gjithë shoqëror deri në ndryshimin e plotë të kësaj gjendjeje”, ka deklaruar Nagavci.
Ajo ka përmendur edhe proceset e shumta zgjedhore që janë zhvilluar gjatë viteve të fundit në nivel lokal dhe nacional, duke thënë se ato kanë kërkuar angazhim, përkushtim dhe përgjegjësi të vazhdueshme nga strukturat e partisë.
“Tani me institucione të konstituuar presim një punë të mbarë dhe një angazhim të suksesshëm në Qeveri e Kuvend në përmbushjen e zotimeve tona programore, avancimin e reformave dhe përmirësimin e mirëqenies së qytetarëve”, ka thënë ajo.
Ndërkaq, Nagavci ka bërë të ditur se Lëvizjen Vetëvendosje në muajt e ardhshëm e presin edhe procese të rëndësishme të brendshme, përfshirë zgjedhjet partiake.
“Njëkohësisht, në muajt në vijim na presin edhe procese të rëndësishme brenda Lëvizjes Vetëvendosje, zgjedhjet e brendshme, të cilat janë pikë e diskutimit edhe në ditën e sotme, pra në mbledhjen e Këshillit të Përgjithshëm”, ka deklaruar Nagavci.
Ajo i ka cilësuar këto zgjedhje si mundësi për ripërtëritjen dhe fuqizimin e strukturave partiake, rritjen e pjesëmarrjes së anëtarësisë dhe forcimin e mëtejmë të organizimit të Lëvizjes Vetëvendosje./teve1.info/
