Shefi i asamblistëve të Lëvizjes Vetëvendosje në Kuvendin Komunal të Prishtinës, Gëzim Sveçla, publikoi një dokument pasi kryetari i Prishtinës, Përparim Rama, u paraqit në Prokurorinë Speciale, ku po merret në pyetje në cilësinë e të dyshuarit lidhur me projektin “Arkitekti i Kryeqytetit”.
“Plot 1 milion e 48 mijë euro i ka paguar Komuna e Prishtinës për shërbimet e ofruara nga Zyra e Arkitektit të Kryeqytetit, vetëm për dy muaj, tetor dhe nëntor të vitit 2023.
Shërbimi i ofruar me vlerë mbi 1 milion euro, sipas përshkrimit në faturë, ka qenë – KONSULENCË!!
Ndërkohë, kontrata e përgjithshme për këtë projekt kap vlerën prej 12 milionë eurosh.
Tre vjet më vonë, kryetari i Prishtinës, Përparim Rama, është thirrur për t’u intervistuar në cilësinë e të dyshuarit nga Prokuroria Speciale e Republikës së Kosovës, pikërisht lidhur me këtë projekt të cilin si Lëvizje VETËVENDOSJE! e kemi denoncuar qysh nga dita e parë|, shkroi në Facebook, Sveçla.
Nga ana tjetër, kryetari i Prishtinës, Përparim Rama, foli shkurt para mediave para se të hynte në Prokurori Speciale për marrje në pyetje.
“Detyra ime është që të ndërtoj kryeqytetin, detyra e tyre është me pa që krejt bëhet në mënyrë ligjore”, tha Rama.
