Protestuesit që u mblodhën para ndërtesës së Qeverisë së Kosovës në Prishtinë, gjatë kohës kur ministrja e Drejtësisë, Donika Gërvalla, dhe ministri i Punëve të Brendshme, Xhelal Sveçla, po mbanin konferencë për media, janë nisur drejt Pejës.
Ata pritet t’i bashkohen protestës së paralajmëruar në këtë qytet, pas vrasjes së Arlinda Zekajt në Vitomiricë.
Sipas agjendës së organizatorëve, protesta në Pejë do të nisë në orën 12:00, në korzon e qytetit, prej nga protestuesit do të marshojnë drejt institucioneve përgjegjëse.
Marshimi pritet të përfshijë Komunën e Pejës, Qendrën për Punë Sociale, Policinë, Gjykatën dhe Prokurorinë, ku do të kërkohet drejtësi për Arlinda Zekajn dhe përgjegjësi institucionale për trajtimin e rastit të saj.
Protesta vjen pas reagimeve të shumta publike për vrasjen e saj, e cila ka rikthyer në vëmendje përgjegjësinë e institucioneve në trajtimin e rasteve të dhunës në familje dhe mbrojtjen e viktimave.
