Zëvendëskryeministrja dhe ministrja e Drejtësisë, Donika Gërvalla, ka pritur në takim ambasadorin e Austrisë në Kosovë, Georg Schnetzer, me të cilin ka diskutuar për thellimin e bashkëpunimit në fushën e drejtësisë dhe avancimin e reformave institucionale.
Përmes një postimi në Facebook, Gërvalla ka theksuar se reforma në drejtësi mbetet një agjendë e rëndësishme për forcimin e integritetit institucional, rritjen e llogaridhënies dhe garantimin e barazisë para ligjit.
Ajo ka përmendur si pjesë të këtij procesi themelimin dhe funksionalizimin e Byrosë, zbatimin e procesit të Vetingut, avancimin e pakos së projektligjeve për Reformën në Drejtësi, si dhe finalizimin e legjislacionit civil.
Gërvalla ka theksuar gjithashtu rëndësinë e finalizimit të Marrëveshjes me Austrinë për Bashkëpunim Gjyqësor në Çështjet Penale, e cila synon forcimin e bashkëpunimit juridik ndërkombëtar, veçanërisht në fushën e ekstradimit, ndihmës së ndërsjellë juridike dhe transferimit të personave të dënuar.
“Austria mbetet një partner i rëndësishëm i Republikës së Kosovës. Thellimi i bashkëpunimit ndërmjet institucioneve tona i shërben forcimit të kapaciteteve shtetërore, avancimit të reformave dhe konsolidimit të një sistemi drejtësie që garanton sundimin e ligjit, integritetin institucional dhe përgjegjësinë para ligjit”, ka shkruar Gërvalla./teve1.info/
