Kryeministri i Kosovës, Albin Kurti, i ka bërë thirrje Bashkimit Evropian që të marrë vendim për aplikimin e Kosovës për anëtarësim, duke kërkuar që vendit t’i jepet statusi i kandidatit dhe të hapen negociatat për anëtarësim.
Në fjalimin e tij në seancën plenare të Samitit të 13-të të Procesit të Berlinit, që po mbahet në Mal të Zi, Kurti ka theksuar se Kosova mbetet i vetmi vend në Ballkanin Perëndimor që ende nuk e ka marrë statusin e vendit kandidat për anëtarësim në BE.
“Ne kemi bërë atë që na përkiste vetëm neve të bënim. Aplikimi i Kosovës po pret, që nga dhjetori i vitit 2022, për një vendim që i përket ekskluzivisht BE-së. Deri atëherë, mbetemi i vetmi shtet në Ballkanin Perëndimor pa statusin e vendit kandidat”, ka deklaruar Kurti.
Ai u ka bërë thirrje liderëve evropianë që të kërkojnë opinionin e Komisionit Evropian për aplikimin e Kosovës dhe të avancojnë procesin e integrimit të saj.
“Kërkojmë nga ju ta merrni vendimin: të kërkoni opinionin e Komisionit, t’i jepni Kosovës statusin e vendit kandidat dhe të hapni negociatat për anëtarësim”, ka thënë kryeministri.
Gjatë fjalimit, Kurti ka theksuar se Kosova i përmbahet vlerave demokratike të Bashkimit Evropian dhe se vlerësimet e pavarura e rendisin vendin ndër shtetet me përparimin më të madh demokratik në Evropën Jugore.
Ai ka përmendur luftën kundër korrupsionit dhe sundimin e ligjit si fusha në të cilat, sipas tij, Kosova ka shënuar përparim.
“Në politikën e jashtme, ne veprojmë sikur vend anëtar: nga dita e parë, kemi zbatuar secilin sanksion të BE-së kundër Rusisë, dhe te Kosova, Moska kurrë nuk ka gjetur as edhe një çarje te qëndrimi për Evropën”, ka deklaruar Kurti.
Kryeministri ka kritikuar gjithashtu qasjen që, sipas tij, synon sigurimin e stabilitetit në kurriz të demokracive fqinje.
“Blerja e stabilitetit në kurriz të demokracive fqinje është dëshmuar mit i rrezikshëm, sepse ata që krijojnë jostabilitet nuk mund të garantojnë stabilitet”, ka thënë ai.
Kurti ka folur edhe për përfitimet që Kosova dhe qytetarët e saj mund të kenë nga integrimi gradual në tregun evropian.
Ai ka përmendur anëtarësimin në Zonën Unike të Pagesave në Euro (SEPA), lehtësimin e tregtisë përmes korridoreve të gjelbra dhe uljen e kostove të komunikimit përmes nismës “Roam Like at Home”.
Sipas tij, pjesëmarrja në SEPA pritet t’u kursejë qytetarëve të Kosovës dhe mërgatës rreth 58 milionë euro në vit, ndërsa korridoret e gjelbra do të ndihmojnë në përshpejtimin e tregtisë me Bashkimin Evropian.
“SEPA do t’u kursejë së shpejti qytetarëve tanë dhe mërgatës 58 milionë euro në vit, Green Lanes do ta përshpejtojnë tregtinë me BE-në, dhe me ‘Roam Like at Home’, interneti në telefon do të kushtojë njësoj atje si këtu”, ka deklaruar Kurti.
Ai ka vlerësuar se këto mekanizma dëshmojnë se integrimi evropian mund të sjellë përfitime konkrete për qytetarët edhe para anëtarësimit të plotë.
Në fund, Kurti ka theksuar se shpejtësia e avancimit të Kosovës drejt Bashkimit Evropian nuk varet vetëm nga veprimet e institucioneve të vendit, por edhe nga vendimet që duhet të merren nga vetë BE-ja./teve1.info/
