Gresa Krasniqi ka bërë të ditur se babai i saj, Jakup Krasniqi, ka refuzuar kontrollin mjekësor nga mjekët në Hagë, duke i thënë se nuk dëshiron të pranojë më kujdes shëndetësor nga institucionet atje.
Përmes një postimi në rrjetet sociale, ajo ka shprehur shqetësimin për gjendjen shëndetësore të të atit, pas një bisede telefonike me të.
Sipas saj, ish-kryetari i Kuvendit të Kosovës i ka treguar se ka vendosur të mos pranojë më trajtim mjekësor nga institucionet përkatëse, për shkak të pakënaqësisë me mënyrën se si, sipas tij, po trajtohet në Hagë.
Gresa Krasniqi ka thënë se ky qëndrim e shqetëson, sidomos për shkak të moshës së të atit dhe rëndësisë që ka kujdesi shëndetësor për të.
Ajo ka shprehur vështirësinë për ta bindur atë që të pranojë ndihmën mjekësore nga një sistem ndaj të cilit, sipas saj, ka humbur besimin.
“Si mund t’i kërkoj të pranojë kujdesin e atyre institucioneve, kur ai ndihet i tradhtuar pikërisht nga drejtësia që duhej ta mbronte?”, ka shkruar ajo.
Në reagimin e saj, Gresa ka shprehur edhe ndjenjën e pafuqisë përballë situatës, duke theksuar se familja dëshiron që Jakup Krasniqi të jetë i fortë dhe me shëndet të mirë.
“U ndjeva aq e pafuqishme përballë kësaj fuqie ndërkombëtare kaq të padrejtë. Ne jemi këtu, Babi. Të duam të fortë, të duam të shëndetshëm”, ka deklaruar ajo.
Në fund, ajo ka kundërshtuar dënimin e të atit, duke e cilësuar atë si padrejtësi.
“Dënimi i Babit nuk është një gabim që pret të korrigjohet. Është një padrejtësi”, ka shkruar Gresa Krasniqi./teve1.info/
