Mbetjet mortore të Liridona Deliut, e cila ndërroi jetë gjatë luftës në Kosovë në prill të vitit 1999, janë rivarrosur të mërkurën në fshatin Kopiliq të Skenderajt.
Lajmi është bërë i ditur nga Komisioni Qeveritar për Persona të Zhdukur, përmes një njoftimi në Facebook.
Sipas Komisionit, familja Deliu për vite me radhë nuk e dinte vendndodhjen e mbetjeve mortore të Liridonës, e cila nuk i kishte mbushur ende dy vjet kur ndërroi jetë.
Për këtë arsye, familja kishte kërkuar ndihmën e institucioneve për gjetjen dhe identifikimin e mbetjeve mortore, me qëllim që të kishte një vend ku mund ta nderonte kujtimin e saj.
Gjetja dhe identifikimi u mundësuan përmes bashkëpunimit ndërmjet Komisionit Qeveritar për Persona të Zhdukur, Drejtorisë së Policisë për Hetimin e Krimeve të Luftës dhe Institutit për Mjekësi Ligjore.
Identifikimi u bë përmes analizës së ADN-së.
Rivarrimi u realizua në përputhje me kërkesën e familjes Deliu.
“Në këtë ditë të dhimbshme, qëndrojmë pranë familjes Deliu”, thuhet në njoftimin e Komisionit Qeveritar për Persona të Zhdukur./teve1.info/
