Shaqir Totaj nga Partia Demokratike e Kosovës (PDK) ka deklaruar se aktgjykimi i Hagës ndaj ish-krerëve të Ushtrisë Çlirimtare të Kosovës ka ndikuar në zhvillimet e brendshme të partisë.
Megjithatë, ai ka thënë se nuk beson që ky vendim është arsyeja e tërheqjes së mundshme të Bedri Hamzës nga pozita e kryetarit të PDK-së.
Totaj i bëri këto komente në emisionin “Këndi i Debatit” në Tëvë1, ku foli për zhvillimet e fundit brenda partisë dhe paralajmërimet për dorëheqjen e Hamzës.
Ai ka shtuar se vendimi i Hagës ishte i papritur për PDK-në dhe se, pavarësisht rezultatit, nuk mund të kalonte pa ndikim në zhvillimet politike brenda partisë.
“Aktvendimi në Hagë ka qenë diçka që, sinqerisht, nuk e kemi pritur në asnjë variant. Nuk e kemi pritur një dënim maksimal të tillë dhe normal që çfarëdo që të kishte ndodhur atje nuk ka mundur të kalojë pa influencë. Normal që ka pasur ndikime, mirëpo nuk e besoj që ai aktgjykim atje është arsyeja që Bedri Hamza të tërhiqet nga pozita e kryetarit të PDK-së”, ka deklaruar Totaj.
Duke komentuar reagimin politik pas vendimit të Hagës, Totaj është shprehur se PDK-ja nuk ka mundur të qëndrojë pasive përballë këtij zhvillimi.
Ai ka theksuar se beson në drejtësinë ndërkombëtare, por njëkohësisht ruan të drejtën për të besuar në pafajësinë e ish-krerëve të UÇK-së.
“Ne, në aspektin politik, thjesht nuk kemi mundur të qëndrojmë duarkryq pas një vendimi të tillë. Natyrisht që i besojmë drejtësisë ndërkombëtare, sepse Kosova si shtet është produkt i asaj drejtësie ndërkombëtare, mirëpo megjithatë ne e ruajmë të drejtën të besojmë në pafajësinë e liderëve tanë”, është shprehur ai.
Totaj ka shtuar se procesi mund të kontestohet përmes argumenteve dhe mjeteve juridike, duke theksuar se nuk pajtohet me cilësimin “ndërmarrje e përbashkët kriminale”.
“Ky është qëndrimi im personal dhe, derisa ne tentojmë të bëjmë një zgjidhje në kuadër të këtij sistemi të drejtësisë ndërkombëtare, nëse nuk ke besim në të, atëherë bie në kundërshtim me vetveten. Mirëpo, në asnjë mënyrë nuk pajtohem me këtë kualifikim të Hagës, ‘ndërmarrje e përbashkët kriminale’”, ka thënë Totaj.
Ai ka përfunduar duke shprehur bindjen se përmes mjeteve juridike mund të kërkohet ndryshimi i aktgjykimit dhe lirimi i ish-krerëve të UÇK-së.
“Nuk pajtohem me këtë kualifikim, mirëpo i besoj drejtësisë ndërkombëtare, sepse konsideroj që me mjete juridike do të arrijmë ta ndryshojmë këtë aktvendim dhe liderët tanë do të lirohen”, ka përfunduar Totaj./teve1.info/
