Ushtarët italianë të misionit të KFOR-it kanë realizuar një projekt për mbështetjen e Stacionit të Zjarrfikësve në Pejë, duke dorëzuar një automjet të ri të pajisur me sistem për shuarjen e zjarreve.
Sipas njoftimit të KFOR-it, projekti u realizua nga Ekipi për Bashkëpunim Civilo-Ushtarak (CIMIC), në kuadër të Komandës Rajonale në Perëndim (RC-W).
Ceremonia e pranim-dorëzimit u drejtua nga komandanti i RC-W-së, koloneli Giuseppe De Blasi, dhe drejtori ekzekutiv i Agjencisë së Menaxhimit të Emergjencave (AME), Shefki Abdullahu.
Automjeti i tipit pickup, i pajisur me një sistem të avancuar për shuarjen e zjarreve, pritet të ndihmojë në forcimin e kapaciteteve operacionale të zjarrfikësve në Pejë dhe në përmirësimin e reagimit ndaj rasteve emergjente.
KFOR-i theksoi se kjo nismë është pjesë e përkushtimit të vazhdueshëm të misionit për bashkëpunim me institucionet vendore dhe mbështetjen e projekteve që u shërbejnë komuniteteve lokale në Kosovë.
