Analisti politik Ardian Bytyqi, i ftuar në emisionin “Ditari” në Teve1, ka komentuar protestën e studentëve në Shqipëri dhe përshkallëzimin e saj, duke kritikuar ashpër kryeministrin Edi Rama dhe mënyrën se si qeveria po përballet me protestuesit.
Bytyqi ka vlerësuar se problemi në Shqipëri lidhet me korrupsionin dhe, sipas tij, me një sistem të kalbur, ndërsa ka kritikuar edhe ofertën për shpërblimin e policëve me nga 2.500 euro, në një kohë kur ata përballen me protestuesit.
“Komplet nomenklatura e kryeministrit Rama, nëse mund të themi, është e korruptuar dhe ai sistem është i kalbur. Paramendoni, në një krizë të tillë, kryeministri t’u ofrojë nga 2.500 euro policëve që duhet t’i rrahin ose t’i gjuajnë me gaz lotsjellës fëmijët e kolegëve të tyre, sepse shumë prej atyre policëve kanë fëmijë dhe ata mund të jenë studentë”, është shprehur Bytyqi.
Ai ka thënë se, sipas tij, kryeministri Rama do të duhej të dialogonte me studentët, në vend që të ofronte shpërblime për policët që përballen me protestuesit.
“Personi i parë që duhet t’i thërriste në takim është Edi Rama, e jo t’u japë nga 2.500 euro policëve për t’i rrahur protestuesit. Nëse ai i cilëson këta protestues si brez të pashkolluar dhe qenie të verbra, atëherë kjo është pikërisht pasojë e kësaj qeverisjeje të Edi Ramës, i cili prej sa e sa vitesh po e mban peng Shqipërinë”, ka deklaruar Bytyqi.
Më tej, analisti ka kritikuar edhe mënyrën se si, sipas tij, Rama po e paraqet situatën në Shqipëri para bashkësisë ndërkombëtare, duke pretenduar se vendi po ecën mirë.
“E kam thënë edhe më herët dhe po e them edhe sot: nga viti 1991, ne kemi ndërruar vetëm pushtuesin. Nga Sali Berisha e kemi kthyer te Edi Rama. Prandaj, nuk mund ta besoj se si Edi Rama po e mashtron bashkësinë ndërkombëtare, duke raportuar se gjithçka po duket bukur dhe se gjithçka është mirë”, ka thënë ai.
Në përfundim, Bytyqi ka vlerësuar se përgjegjësia për gjendjen politike në Shqipëri nuk mund t’i atribuohet vetëm njërit prej dy liderëve kryesorë politikë të vendit.
“Unë mendoj se e keqja dhe e zeza e Shqipërisë janë Sali Berisha dhe Edi Rama”, ka përfunduar Bytyqi.
