Gjashtë shtetas nga Bangladeshi dyshohet se janë sjellë ilegalisht në Kosovë nga Maqedonia e Veriut. Rasti është zbuluar në fshatin Dobresh të Vitisë, ku Policia ka ndaluar një veturë me shtatë persona.
Sipas raportit 24-orësh të Policisë së Kosovës, ngjarja ka ndodhur më 17 tetor 2026, rreth orës 21:55.
Gjatë kontrollit, zyrtarët policorë kanë identifikuar vozitësin, një shtetas kosovar, si dhe gjashtë personat e tjerë, të cilët nuk posedonin dokumente identifikimi. Ata kanë deklaruar se janë shtetas të Bangladeshit.
Sipas deklarimit të vozitësit, personat e huaj ishin sjellë në Kosovë nga Maqedonia e Veriut, duke kaluar përmes rrugëve ilegale.
Pas intervistimit, i dyshuari dhe vetura janë liruar, ndërsa gjashtë shtetasit e huaj janë trajtuar nga njësitë përkatëse. Atyre u është lëshuar edhe vërtetimi për akomodim, në përputhje me ligjin.
“Kontrabandim me migrantë – Fshati Dobresh, Viti, 17.10.2026, ora 21:55. Njësia policore ka lokalizuar një veturë në të cilën ndodheshin shtatë persona. Gjatë legjitimimit është identifikuar vozitësi, i dyshuari mashkull kosovar, si dhe gjashtë persona të tjerë, të cilët nuk kishin dokumente me vete, por që, sipas deklarimit të tyre, janë shtetas të Bangladeshit. Sipas deklarimit të të dyshuarit, vozitësit, personat e huaj janë sjellë në Kosovë nga Maqedonia e Veriut përmes rrugëve ilegale. Pas intervistimit, i dyshuari së bashku me veturën janë liruar, ndërsa personat me shtetësi të huaj janë trajtuar nga njësitë përkatëse, të cilëve u është lëshuar edhe vërtetimi i akomodimit të tyre, në përputhje me ligjin”, shkruhet në njoftimin e Policisë.
