Për mbi 25 mijë familje në Prishtinë, sot ka nisur furnizimi me ngrohje.
Megjithatë, prishtinasit akoma nuk e dijnë me saktësi se sa do të paguajnë për ngrohjen të cilën do ta shfrytëzojnë.
Kjo pasi, “Termokosi” është në pritje të ZRRE-së që t’i caktoj tarifat.
Prandaj, kjo gjë ka shqetësuar qytetarët.
“Vërejtje është çmimi nuk e di në bazë të kujt po i ngrisin çmimet e këto. Tash po folët që prapë me i ngrit është e pamundur me këto është e pamundur me i mbulua. Vitin e kaluar i kam paguar 73 euro nuk kanë ardh me mi ngjit matëset a më herët 54 euro ka qenë e prere, por këtë vit nuk e di deri sat ë lajmërojnë se sa do të paguajmë”, shprehet Feriz Ferizi-qytetar.
Mundësia që çmimi të shtrenjtohet, po e brengos edhe qytetarin Rizah Gashi.
“Ata kanë lajmëruar shtrenjtimin, por aq sa do të bëhet ky shtrenjtim nuk e di, po ne pensionistet nuk është se jemi në nivel, po shpresojmë të bëhet një çmim që me pas mundësi me i përballu”, shprehet ai.
Dita e parë e furnizimit me ngrohje nuk kaloi pa probleme.
Në disa raste pati ndërprerje të furnizimit, si shkak i disa intervenimeve të KEDS-it.
“Përkohësisht është dashur që të ndërpritet furnizimi me energji termike për shkak të intervenimeve që na ka paralajmëruar KEDS që është duke i bërë në rrjetin e energjisë elektrike nga i cili furnizohemi ne. Po presim shumë shpejt konfirmimin e KEDS që do të vazhdojnë me furnizimin me energji elektrike pasi që bëhet fjalë për 886 nënstacione të ngrohjes”, sqaroi Afërdita Uka-zëdhënëse në Termokos.
E pas përfundimit të këtyre punimeve, zëdhënësja e “Termokosit”, Afërdita Uka, ka treguar se furnizimi me ngrohje i është rikthyer normalitetit.
