Kryeministri i Shqipërisë, Edi Rama, ka përjashtuar mundësinë e dorëheqjes nga detyra, pas protestave të shoqëruara me përplasje dhe dëmtime në Tiranë.
Në një përgjigje me shkrim për agjencinë ndërkombëtare të lajmeve Reuters, Rama deklaroi se qeveritë ndryshohen përmes zgjedhjeve demokratike dhe jo përmes dhunës.
Kreu i qeverisë u shpreh se protestat paqësore dhe kërkesat e studentëve për arsim më të mirë, më shumë mundësi dhe llogaridhënie duhet të respektohen.
Ai theksoi se qeveria është e gatshme të zhvillojë dialog dhe të trajtojë shqetësimet legjitime të të rinjve.
Në deklaratën e tij, Rama u ndal edhe te lufta kundër korrupsionit, duke pretenduar se Shqipëria po bën përparim në këtë drejtim falë reformës në drejtësi dhe forcimit të pavarësisë së gjyqësorit.
Ai bëri dallimin mes protestës paqësore dhe akteve të dhunës, duke deklaruar se sulmet ndaj institucioneve, dëmtimi i pronës publike dhe rrezikimi i sigurisë nuk lidhen me kërkesat legjitime të studentëve.
“Unë nuk do të lejoj që dhuna të devijojë të ardhmen europiane të Shqipërisë”, u shpreh Rama, duke nënvizuar se vendi duhet të vijojë rrugën drejt anëtarësimit në Bashkimin Evropian.
Sa u përket thirrjeve për dorëheqjen e tij, kryeministri theksoi se përgjegjësia e tij është të dëgjojë qytetarët, të adresojë shqetësimet e tyre dhe të vijojë punën për përmbushjen e objektivave të integrimit evropian.
“Qeveritë ndryshohen përmes zgjedhjeve demokratike, jo përmes dhunës”, deklaroi Rama, duke iu referuar mandatit të marrë në zgjedhjet e fundit./teve1.info/
