Xhiro e nëntë e Superligës së Kosovës në futboll, do të mbyllet me ndeshjen më interesante, atë për pozitën e parë në tabelë.
Derbi ndërmjet Malishevës dhe Prishtinës, është ndeshja e fundit e kësaj xhiroje që nisi të martën dhe pritet të jetë një lojë e fortë, me të dyja skuadrat që synojnë fitoren.
Kjo përballje, luhet sot nga ora 14:00 në stadiumin “Liman Gegaj” dhe vë përballë skuadrat që ndajnë dy pozitat e para në tabelë me pikë të njëjta.
Malisheva është e para në tabelë me 19 pikë, sa i ka edhe Prishtina në pozitën e dytë por ka një ndeshje më pak të zhvilluar dhe fituesi i këtij dueli konfirmohet lider të paktën për fazën e parë të këtij sezoni.
Për dallim prej Malishevës që krahas gjashtë fitoreve, ka edhe një barazim e një humbje, Prishtina ka pasur një seri fantastike prej gjashtë fitoreve rresht deri në xhiron e shkuar kur barazoi pa gola me Dukagjinin.
Kështu që, të dy skuadrat janë përgatitur maksimalisht dhe ndeshjes do t’i qasen me seriozitetin më të madh për pikët e plota, duke pasur parasysh rëndësinë e përballjes.
