Ministri për Evropën dhe Punët e Jashtme i Shqipërisë, Ferit Hoxha, ka reaguar lidhur me protestat në Tiranë, duke i cilësuar të papranueshme pamjet e dhunës, shkatërrimit të pronës dhe sulmeve ndaj institucioneve dhe selive diplomatike.
Në reagimin e tij, Hoxha thekson se Shqipëria ka shënuar përparim të rëndësishëm në rrugën drejt anëtarësimit në Bashkimin Evropian, duke fituar besim dhe respekt në arenën ndërkombëtare. Sipas tij, akte të tilla dëmtojnë imazhin e vendit dhe krijojnë perceptime negative për sigurinë e turistëve dhe investitorëve.
“Shqipëria ka bërë hapa madhorë në rrugën drejt Bashkimit Evropian, duke fituar më shumë besim dhe respekt ndërkombëtar dhe duke ndërtuar imazhin e një vendi të qëndrueshëm, të sigurt, mikpritës dhe gjithnjë e më tërheqës”, shprehet Hoxha.
Ai nënvizon se dhuna ndaj institucioneve dhe dëmtimi i pronës publike e private cenojnë imazhin e Shqipërisë si një vend i sigurt dhe mund të ndikojnë negativisht në perceptimin ndërkombëtar për stabilitetin e vendit dhe përparimin e tij drejt integrimit evropian.
Ministri thekson se protesta paqësore dhe shprehja e pakënaqësisë janë pjesë thelbësore e demokracisë, por dhuna nuk mund të justifikohet.
“Askush nuk duhet të dëmtojë një pasuri që na përket të gjithëve: emrin dhe reputacionin e Shqipërisë”, përfundon mesazhi i tij./teve1.info/
