Ministri i Mbrojtjes i Kosovës, Ejup Maqedonci, të mërkurën ka pritur në takim Përfaqësuesin e Përhershëm të Republikës së Turqisë në NATO, ambasadorin Basat Öztürk, me të cilin ka diskutuar për bashkëpunimin në fushën e mbrojtjes dhe mbështetjen e vazhdueshme të Turqisë për Kosovën.
Siç bëhet e ditur në njoftim, gjatë takimit është diskutuar edhe për zgjerimin e mundësive të shkollimit të pjesëtarëve të Forcës së Sigurisë së Kosovës në institucionet arsimore të NATO-s, rritjen e trajnimeve dypalëshe, si dhe mbështetjen e Turqisë për procesin e integrimit të Kosovës në NATO.
Ministri Maqedonci e ka njoftuar ambasadorin Öztürk për zhvillimin dhe progresin e vazhdueshëm të FSK-së, me theks të veçantë në ngritjen e kapaciteteve operacionale dhe profesionale.
“Republika e Turqisë mbetet një partner i rëndësishëm strategjik i Republikës së Kosovës”, ka deklaruar Maqedonci./teve1.info/
