Kryetari i Prishtinës, Përparim Rama, ka paralajmëruar padi civile ndaj deputetit të Lëvizjes Vetëvendosje, Egzon Azemi, duke i kërkuar atij të tërheqë akuzat që i ka cilësuar të pabazuara dhe të kërkojë falje publike.
Përmes një postimi në Facebook, Rama ka kritikuar deklaratat e deputetit Azemi, duke thënë se asnjë parti politike nuk mund të marrë rolin e prokurorisë apo të gjykatës.
“Kur një deputet kërcënon publikisht me arrestime e dënime, duke folur me siguri në emër të drejtësisë, atëherë kemi problem serioz. As Egzon Azemi, as Vetëvendosje dhe asnjë parti politike nuk janë prokurori, gjykatë apo organ i drejtësisë në Republikën e Kosovës! Drejtësia nuk ndahet në zyrat e partive politike. Fajësia nuk përcaktohet me statuse në Facebook dhe askush nuk shpallet fajtor sipas dëshirave të pushtetit”, ka shkruar Rama.
Ai ka bërë të ditur se përmes një shkrese zyrtare i ka kërkuar Azemit që t’i tërheqë akuzat për kryerje të veprave penale, t’i përgënjeshtrojë ato publikisht dhe të kërkojë falje.
Sipas Ramës, nëse deputeti nuk i përmbush këto kërkesa brenda shtatë ditësh, ai do të ushtrojë padi civile për shpifje dhe kompensim të dëmit jomaterial.
“Me këtë shkresë, i kam kërkuar deputetit Egzon Azemi të tërheqë akuzat e pabazuara për kryerje të veprave penale, t’i përgënjeshtrojë publikisht dhe të kërkojë falje. Nëse brenda 7 ditëve nuk e bën këtë, do të ushtroj padi civile për shpifje dhe kompensim të dëmit jomaterial”, ka njoftuar ai.
Kryetari i Prishtinës ka theksuar se nuk i frikësohet asnjë hetimi apo procesi ligjor, por ka kundërshtuar, siç është shprehur, përdorimin e propagandës, shpifjes dhe linçimit publik si mjete të luftës politike.
“Drejtësia nuk është pronë e Vetëvendosjes. Mandati i deputetit nuk është licencë për të shpifur”, ka përfunduar Rama në reagimin e tij./teve1.info/
