Gjatë kohës së luftës, mbante pozitën e komandantit të Policisë në Gjilan.
Dragotin Neskoviq, për krimet e kryera në Zhegër e Llashticë, ka nisur betejën me drejtësinë.
Ai i mohoi akuzat për krime lufte.
“Nuk ndihem fajtor”, u shpreh i akuzuari.
Para trupit gjykues, Prokuroria filloi me fjalët hyrëse, ku u dhanë detaje rreth akuzës për vrasje të civilëve.
“Do të vërtetohet se forcat serbe nën komandën e të akuzuarit, Dragotin Neskoviq, me datë 13.03.1999 hynë në fshatin Zhegër dhe kryen vrasjen e civilëve shqiptarë. Po ashtu, do të vërtetohet se forcat serbe nën komandën e të akuzuarit, nga 27.03.1999-13.04.1999, kryen vrasje të civilëve shqiptarë në fshatin Llashticë”, tha prokurori Armend Zenelaj.
Përpos vrasjeve, prokuroria e ngarkon Neskoviq edhe me përgjegjësi penale të plaçkitjes dhe djegies së pronave të civilëve shqiptarë.
“Plaçkitën dhe ua dogjën shtëpitë e familjeve shqiptare në fshatin Pasjan, edhe pse i akuzuari në atë periudhë ishte komandant i stacionit policor, i kishte parë shtëpitë duke u plaçkitur e djegur, asnjëherë nuk i ka parandaluar këto veprime”, tha prokurori.
Akuzat e saj, prokuroria i mbështetë në dëshmitarë.
“Do të rrëfejnë lidhur me rrethanat e vrasjeve, plaçkitjeve dhe dëbimin e popullsisë civile shqiptare. Ngjarje këto, të cilat këta dëshmitarë që do të dëgjohën, i panë dhe i përjetuan”, tregoi prokurori Zenelaj.
Akuzat e prokurorisë, mbrojtja i quajti të pabazuara.
“Viktimat që kanë humbur jetën në Zhegër dhe Llashticë, i kanë kryer pjesëtarët e forcave paramilitare, ndaj të cilëve komandanti i atëhershëm, Dragotin Neskoviq nuk ka pasur komandë”, u shpreh Vasilije Arsiq, avokat i të akuzuarit.
Seanca vazhdoi me dëgjimin e dëshmitarit të parë.
Ilaz Ramushi, tha se gjatë luftës kishe rastisur dy herë në të akuzuarin.
“T’u komuniku me kët’, Dragotinin, një polic tjetër dul prej kerrit edhe na u drejtu neve që ishim aty me nervozën maksimale “keni kërku shtet, keni kërku NATO, bombat po bijnë në Serbi, ky është veç fillimi, për shtet gjaku duhet m’u bo deri n’gu”, rrefu ngjarjen dëshmitari, Ilaz Ramushi.
Ai tregon se ishin detyruar të largoheshin nga shtëpitë dhe të strehoshin maleve të Gjilanit, aty ku u vranë tre persona.
“Me datë 13 kanë ndodhë tri vrasje në mal, kurse me datën 16, unë nuk kam qenë më në fshat sepse pata dalë në Preshevë. Por, një kushëri i imi i ka varrosë, nënën time, mixhën tim dhe një person tjetër. Mixhën e kemi gjetë pasi u kry lufta, i vjerrë në pemë”, vazhdoi dëshmitari.
Gjykimi do të vazhdojë me dëgjimin e dëshmitarëve të tjerë, të cilët në këtë proces gjyqësor kanë statusin edhe të të dëmtuarve.
