Protesta e studentëve para Ministrisë së Arsimit ka nisur me tensione, teksa disa prej demonstruesve kanë shkulur kangjellat metalike dhe sinjalistikën rrugore pranë ndërtesës, si dhe kanë hedhur sende të forta në drejtim të forcave të policisë.
Më herët, studentët iu drejtuan në kor efektivëve të Forcave Speciale me thirrjen: “Mos na provokoni!”.
Ndryshe nga përplasjet e një dite më parë, deri në këto momente policia nuk ka ndërhyrë dhe efektivët po qëndrojnë brenda perimetrit të ndërtesës së ministrisë.
Edhe pse protesta ishte paralajmëruar të niste në orën 14:00, grumbullimi i studentëve dhe demonstrata nisën më herët, shkruan A2 CNN.
Studentë të Fakultetit të Mjekësisë, Fakultetit të Shkencave të Natyrës dhe fakulteteve të tjera bojkotuan mësimin, duke u mbledhur në rrugë dhe marshuar drejt Ministrisë së Arsimit.
Bojkoti u paralajmërua nga disa universitete dhe fakultete pas përplasjeve të dhunshme të një dite më parë, kur protesta përfundoi me konfrontime mes demonstruesve dhe policisë.
