Në të dy leximet, mori shumicën e votave të të zgjedhurve të popullit.
Ndryshimet e Ligjit për Dhomat e Specializuara të Kosovës, u miratuan në Kuvendin e Republikës së Kosovës, pas aktgjykimit dënues ndaj ish krerëve të UÇK-së.
Mirëpo, ky veprim i ligjvënësve kosovarë nuk u prit mirë nga Bashkimi Evropian.
Së fundi, ishte komisionerja për zgjerim, Marta Kos, që këtë lëvizje të Kuvendit, e quajti të papranueshme dhe në kundështim me normat ndërkombëtarë të sundimit të ligjit.
E kjo, nuk po shihet si befasuese.
“Është e pritshme reagimi i Bashkimit Evropian, por çështja është se cilat do të jenë pasojat dhe cilat do të jenë vendimet e BE-së, dhe si do të përballemi ne si Kosovë, kundrejt presionit dhe kërcënimeve që vijnë nga BE në drejtim të Kosovës, institucioneve të Kosovës”, ka thënë Anton Nrecaj nga Instituti Clard.
Në këtë situatë, Kosova vlerësohet se është mes dy zjarreve.
“Kundërshtimi nga BE për ndryshimin e këtij ligji është mjaft sfiduese, por Kosova si autoritet i cili e ka nxjerrë vet ligjin, pra Kuvendi i Kosovës, natyrshëm që duhet të përpiqet që në njërën anë të sigurojë transparencë të plotë, të sigurojë vendimmarrje të drejtë të bazuar vetëm në prova të qarta dhe bindëse dhe në anën tjetër mos t’i lëndojë urat e bashkëpunimit”, u shpreh avokati, Valdet Hoxha.
Ndryshimet e Ligjit për Specialen, që kanë marrë miratimin e deputetëve të Kuvendit të Republikës së Kosovës, përfshijnë mundësinë e vuajtjes së dënimit në Kosovë dhe faljen presidenciale.
