Deputetja e Lidhjes Demokratike të Kosovës (LDK), Hykmete Bajrami, ka kritikuar Qeverinë e udhëhequr nga Lëvizja Vetëvendosje, duke deklaruar se gjatë gjashtë viteve në pushtet nuk është bërë asnjëherë rishikim i mirëfilltë i buxhetit.
Përmes një postimi në Facebook, Bajrami ka reaguar lidhur me shqyrtimin e Projektligjit për Ndryshimin dhe Plotësimin e Ligjit për Ndarjet Buxhetore për vitin 2026, i cili, sipas saj, të hënën ishte në rend dite në shumicën e komisioneve parlamentare.
Ajo ka vlerësuar se procesi i paraqitur nga Qeveria si rishikim i buxhetit nuk u ka mundësuar organizatave të tjera buxhetore që të rishikojnë ndarjet e tyre financiare.
“Sot, në shumicën e komisioneve parlamentare, në rend dite ishte shqyrtimi i Projektligjit për Ndryshimin dhe Plotësimin e Ligjit për Ndarjet Buxhetore për vitin 2026.Qeveria po e quan këtë rishikim të buxhetit, por në fakt asnjë organizatë tjetër buxhetore përveç Ministrisë së Financave nuk ka pasur mundësi ta rishikojë buxhetin e saj. Për gjashtë vite në pushtet, Lëvizja Vetëvendosje nuk ka bërë asnjëherë rishikim të mirëfilltë të buxhetit”, ka shkruar ajo.
Bajrami ka ngritur gjithashtu shqetësime për realizimin e projekteve kapitale, duke iu referuar raportit gjashtëmujor të shpenzimit të buxhetit të Ministrisë së Financave.
Sipas saj, raporti tregon se mbi 60 për qind e projekteve kapitale kanë pasur normë të realizimit prej zero për qind deri më 30 qershor.
“A ka pasur nevojë për një rishikim të mirëfilltë të buxhetit, këtë më së miri e thotë vetë Ministria e Financave përmes raporteve të saj. Sipas raportit gjashtëmujor të shpenzimit të buxhetit, mbi 60% e projekteve kapitale normën e realizimit deri më 30 qershor e kanë 0%”, ka përfunduar Bajrami./teve1.info/
