Hezbollahu do të paguajë deri në 14,000 dollarë ndihmë për familjet, shtëpitë e të cilave në Liban u shkatërruan ose u bënë të pabanueshme gjatë luftës me Izraelin, tha të martën kreu i Këshillit Ekzekutiv të grupit.
Në një konferencë për shtyp, Ali Daamoush akuzoi shtetin libanez se nuk ka kryer detyrat e tij për të ndihmuar të zhvendosurit.
Ai tha se familjet që humbën shtëpitë e tyre në Bejrut dhe periferitë e tij jugore do të merrnin nga 14,000 dollarë secila, ndërsa ato në vende të tjera në Liban do të merrnin nga 12,000 dollarë.
Çdo pagesë përfshin 8,000 dollarë për mobilje, ndërsa pjesa tjetër do të përdoret për të mbuluar qiranë.
Daamoush nuk tha se sa familje do të përfitonin ose sa do të ishin gjithsej pagesat, shkruan AP.
Konferenca për shtyp ishte e para e grupit për pagesa të tilla që nga dy luftërat e fundit me Izraelin, të cilat vranë më shumë se 8,000 njerëz dhe shkatërruan dhjetëra mijëra shtëpi në Liban.
Rreth 1.2 milion njerëz u zhvendosën në Liban në kulmin e luftës. Shumica janë kthyer në shtëpi që nga armëpushimi, por më shumë se 300,000 mbeten të zhvendosur, sipas Organizatës Ndërkombëtare për Migracionin.
