Presidentja e Kosovës, Justina Shiroka-Pula, të hënën ka vizituar familjet e Hashim Thaçit, Kadri Veselit, Rexhep Selimit dhe Jakup Krasniqit, ish-krerëve të Ushtrisë Çlirimtare të Kosovës, të cilët po përballen me procesin gjyqësor në Dhomat e Specializuara të Kosovës në Hagë.
Sipas njoftimit të Presidencës, gjatë këtyre takimeve, Shiroka-Pula ka shprehur solidaritetin dhe mbështetjen e saj për familjet, duke theksuar se kjo është një periudhë e vështirë si për to, ashtu edhe për Republikën e Kosovës.
Presidentja ka ritheksuar se e drejta e apelit është pjesë e procesit gjyqësor, ndërsa ka deklaruar se institucionet e Kosovës do të vazhdojnë të ofrojnë mbështetje për ish-krerët e UÇK-së, në përputhje me përgjegjësitë dhe mundësitë institucionale.
Ajo ka vlerësuar se lufta e Ushtrisë Çlirimtare të Kosovës ishte luftë për liri, e zhvilluar përballë shtypjes, dhunës dhe krimeve të regjimit serb ndaj popullit të Kosovës.
Sipas saj, mbrojtja e së vërtetës historike dhe e dinjitetit të të gjithë atyre që kontribuuan për lirinë e vendit mbetet e rëndësishme.
Gjatë takimeve, Shiroka-Pula i ka informuar familjet se do të veprojë lidhur me Ligjin për Dhomat e Specializuara, duke respektuar afatet ligjore.
“Familjet nuk janë vetëm në këtë rrugëtim dhe se Presidenca e Republikës së Kosovës do të mbetet e hapur për to, duke vepruar brenda kompetencave të saj kushtetuese dhe ligjore në mbështetje të përpjekjeve për drejtësi”, ka theksuar presidentja Shiroka Pula./teve1.info/
