Policia e Kosovës ka gjetur dhe sekuestruar armë, municion dhe mjete të tjera ilegale në dy lokacione të ndryshme në komunën e Zubin Potokut.
Sipas njoftimit të Policisë, operacioni është realizuar të martën, më 13 tetor, pas informatave të pranuara nga qytetarët.
Gjatë kontrollit në një objekt të pabanuar në fshatin Paruce, policia ka gjetur dhe konfiskuar 141 fishekë të armës së gjatë, 21 fishekë të armës së gjatë me krehër, dy fishekë të pushkës së gjuetisë, katër granata dore, një tytë të pushkës së gjuetisë dhe 48 gëzhoja të pushkës së gjuetisë.
Po ashtu, janë gjetur pajisje për mbushjen e fishekëve, katër kuti me barot, sfera për mbushjen e fishekëve të gjuetisë, kapëse dhe tamponë për fishekë, një maskë gazi ushtarake dhe një bajonetë ushtarake.
Ndërkaq, në një objekt tjetër të pabanuar në fshatin Ranqiq, njësitë policore kanë gjetur një pistoletë, katër granata dore dhe 2 mijë e 56 fishekë të kalibrave të ndryshëm.
Në të dy lokacionet kanë intervenuar edhe njësitë për trajtimin e mjeteve eksplozive (IEOD), të cilat i kanë tërhequr mjetet eksplozive në mënyrë të kontrolluar.
Policia ka bërë të ditur se deri në këtë fazë nuk ka persona të arrestuar, ndërsa për rastet është njoftuar Prokurori i Shtetit, i cili ka udhëzuar inicimin e rasteve për veprën penale “Mbajtje në pronësi, kontroll ose posedim të paautorizuar të armëve”.
Në fund, Policia e Kosovës ka falënderuar qytetarët për bashkëpunimin dhe i ka ftuar që të vazhdojnë të raportojnë informacione që ndihmojnë në ruajtjen e rendit dhe sigurisë publike, përmes numrit emergjent 192./teve1.info/
