Një person është ndaluar për 48 orë, me vendim të prokurorit, lidhur me rastin e vdekjes së një punëtori, i cili humbi jetën gjatë ditës së djeshme në Ferizaj.
Sipas njoftimit të Prokurorisë, i dyshuari është ndaluar nën dyshimin për kryerjen e veprës penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.
“Prokuroria Themelore në Ferizaj, njofton opinionin publik se me vendim të Prokurorit të Shtetit, ka ndaluar një (1) person të dyshuar me iniciale B.T.,në kohëzgjatje prej 48-orësh, për shkak të dyshimit të veprës penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”nga neni 358 sipas Kodit Penal të Republikës së Kosovës”.
Prokuroria ka bërë të ditur se procedurat e mëtejme ligjore ndaj të dyshuarit do të vazhdojnë brenda afateve të përcaktuara me ligj.
Rasti ka të bëjë me vdekjen e një punëtori, i cili dyshohet se ka rënë nga lartësia derisa ishte duke kryer punime në një objekt ndërtimi në rrugën “Cen Dugolli” në Ferizaj.
“Rasti në fjalë ka ndodhur në rrugën ”Cen Dugolli” në Ferizaj, rreth orës 15:50:, ku, një person, i cili po kryente punime në një objekt ndërtimi, dyshohet se ka rënë nga lartësia dhe ka pësuar lëndime të rënda, si pasojë e të cilave ka ndërruar jetë në vendin e ngjarjes. Vdekjen e viktimës e ka konstatuar mjeku kujdestar i Qendrës Emergjente në Ferizaj, kurse, me urdhëresë të prokurorit të shtetit, trupi i pajetë i vitkimës është dërguar për obduksion në Institutin e Mjekësisë Ligjore në Prishtinë”, thuhet në njoftimin e Prokurorisë.
Pas daljes në vendin e ngjarjes, Prokurori i Shtetit ka udhëzuar Policinë dhe Inspektoratin e Punës që të ndërmarrin veprimet e nevojshme hetimore për të sqaruar rrethanat në të cilat ndodhi rasti.
