Nënkryetari i Aleancës, Besnik Tahiri ka reaguar pas vrasjes së një gruaje dhe një burri në Livoç të Ulët të Gjilanit, duke e cilësuar rastin si një sinjal alarmi për gjendjen shoqërore në Kosovë.
Tahiri ka theksuar se shoqëria kosovare nuk mund të synojë të jetë moderne dhe me vlera perëndimore, nëse në rastet e konflikteve dhe mosmarrëveshjeve vazhdon të mbështetet në mentalitete që dhunën e lidhin me traditën dhe kanunin.
Përmes një postimi në Facebook, ai ka bërë të qartë se as tradita, as kanuni dhe as feja nuk mund të përdoren si arsyetim për vrasje.
“Ka ardhur koha të flasim hapur, ta sfidojmë këtë mentalitet dhe të mos heshtim më. Dhuna nuk është nder, në veçanti vrasja e grave nuk është traditë, kurse heshtja nuk është zgjidhje”, ka shkruar Tahiri.
Ai ka kërkuar që shoqëria të përballet hapur me mentalitetin që, sipas tij, e normalizon dhunën, duke theksuar se heshtja nuk mund të jetë përgjigje ndaj rasteve të tilla tragjike./teve.info/
