Ministri i Infrastrukturës dhe Transportit, Dimal Basha, ka pritur të enjten në takim ambasadorin e ri të Francës në Kosovë, Jean-François Huchet, të cilit i ka shprehur gatishmërinë për bashkëpunim të ngushtë gjatë mandatit të tij në Kosovë.
Sipas Bashës, gjatë takimit ai e ka njoftuar ambasadorin për progresin që, sipas tij, Kosova ka shënuar në zhvillimin ekonomik, nivelin e ulët të borxhit publik, forcimin e demokracisë, si dhe rezultatet në luftën kundër korrupsionit dhe krimit të organizuar.
Në fokus të bisedës ishin edhe projektet strategjike infrastrukturore dhe synimet e Kosovës për zhvillimin e mëtejshëm të lidhjeve rrugore dhe hekurudhore.
Basha ka bërë të ditur se tashmë ka nisur bashkëpunimi me Agjencinë Franceze për Zhvillim (AFD), ndërsa ka theksuar se Kosova mirëpret ekspertizën, partneritetin dhe përfshirjen e shteteve mike dhe kompanive në realizimin e projekteve strategjike.
“Franca është aleate dhe partnere e rëndësishme e shtetit tonë, andaj jam i bindur se së bashku do të hapim edhe më shumë mundësi për bashkëpunim reciprok në të ardhmen”, ka shkruar Basha në fund të njoftimit të publikuar në Facebook./teve1.info/
