Emri i Bekim Sejdiut, u përmend edhe njëherë të martën, në ditën e fundit të afatit kushtetues për zgjedhjen e presidentit.
Kryeministri Albin Kurti përmes konferencës së parë për media, kërkoi mbështetjen e Partisë Demokratike, që Sejdiu të jetë kandidat për president.
Por brenda pak minutave, vet profesori Bekim Sejdiu tha se është tërhequr nga kandidatura.
Megjithatë, propozimi nuk ishte i pranueshëm as për PDK-në, që vazhdoi insistimin që ndryshimet në ligjin për Specialen, të votohen edhe në lexim të dytë.
Pas më shumë se një ore, Kurti bëri edhe ofertën e dytë.
Ai propozoi Feride Rushitin dhe Glauk Konjufcën.
Por ai e pati edhe një kërkesë.
“Aman mos m’i thirrni Glaukun e Feriden, une e kryj me ta”, u shpreh Kurti.
Por, PDK-ja ripërsëriti edhe njëherë qëndrimin.
“Për neve është i rëndësishëm kalimi i ligjit, nuk bëjmë pazare”, ishte përgjiegjja e Hamzës.
Për ofertën e tretë, u desh më shumë kohë.
Kësaj here, Kurti erdhi në Kuvendin e Kosovës.
E nga aty, tha se propozon që ish ministrja e PDK-së, Justina Shiroka Pula të bëhet presidente dhe partia e tij, e voton në lexim të dytë projektligjin për plotësim ndryshim të Gjykatës Speciale.
Ky propozim, mori dritën e gjelbër nga PDK-ja.
Por ata patën një kusht.
“Por kundër-kandidate e saj do të jetë Eliza Hoxha”, tha Hama.
Menjëherë pas saj, u hapën dyert e sallës për mbajtjen e seancës së jashtëzakonshme.
Në rend të ditës, pati dy pika.
“Pika e parë e rendit të ditës Ligji për Gjykatën Speciale, e dyta zgjedhja e presidentit të Republikës së Kosovës”, njoftoi kryeparlamnetarja Haxhiu.
Për t’i shmangur procedurat, u mbajtën edhe komisionet.
Gjithçka ndodhi në mënyrë të përshpejtuar.
Njëjtë, deputetët vepruan edhe për pikën e dytë.
Por kësaj radhe, votimi ndodhi në mënyrë të fshehtë.
Me 81 vota për, Justina Shiroka Pula u zgjodh presidente e Republikës.
Në fjalimin e saj, Shiroka Pula u pa mjaft e emocionuar.
Kundërkanditatja e saj, Eliza Hoxha e mori vetëm një votë.
