Ushtruesja e deritashme e detyrës së Presidentes së Kosovës, Albulena Haxhiu, ia ka dorëzuar sot detyrën Presidentes së re të vendit, Justina Shiroka-Pulës.
Gjatë takimit të zhvilluar në Zyrën e Presidencës, Haxhiu e ka uruar Shiroka-Pulën për zgjedhjen në krye të shtetit, duke vlerësuar lart kontributin e saj akademik dhe profesional.
“Urime edhe një herë për zgjedhjen tuaj dje në Kuvendin e Republikës. Konsideroj që është nder i madh për Republikën, por edhe për të gjithë qytetarët që në krye të këtij institucioni shumë të rëndësishëm është një grua për të cilën unë kam shumë respekt”, ka thënë Haxhiu.
Ajo ka theksuar se zgjedhja e Shiroka-Pulës në këtë pozitë përbën një vlerë për vendin, duke e cilësuar atë si një profesoreshë të respektuar dhe një personalitet me kontribut të rëndësishëm.
Haxhiu i ka premtuar Presidentes së re bashkëpunim të plotë gjatë ushtrimit të detyrës.
“Dua të ju uroj edhe një herë përzemërsisht dhe të ju siguroj që bashkëpunimin tim të plotë do ta keni gjithmonë. E paq shëndetin, jetën e gjatë dhe ju priftë e mbara”, ka deklaruar Haxhiu.
Gjatë takimit, ajo ka përshëndetur edhe konsensusin e arritur në Kuvend për miratimin e Ligjit për Dhomat e Specializuara në Hagë, si dhe marrëveshjen politike që i parapriu zgjedhjes së Presidentes së re të Kosovës./teve1.info/
