Kryetari i Aleancës, Ardian Gjini, ka deklaruar se kryeministri Albin Kurti nuk është serioz për zgjedhjen e presidentit. Derisa kanë mbetur më pak se pesë afat për ta zgjedhur të parin e vendit, Gjini akuzoi Kurtin se po e dërgon vendin në zgjedhje të reja.
Gjini në konferencë për media të martën tha se Kurti fokusin kryesor e ka për me adresu fajin te opozita pse vendi po shkon në zgjedhje.
“Që në fillim e kemi pa se ky nuk ka qenë qëllimi i partisë që ka fituar zgjedhjet e kaluar. Sikur të kishin pasur seriozisht, kishin biseduar me ne për ofertën që e kemi dhënë. Fakti që nuk iu ka interesuar fare ka qenë një test për seriozitetin e tyre për me gjetë vendit një zgjidhje dhe mos me i çu qytetarët tanë edhe një herë në zgjedhje. Sot e kemi pa që njëherë e propozon profesorin Bekim Sejdiun me LDK-në, pa e përmendur fare me LDK-në ia propozon PDK-së prapë profesorin Sejdiu. S’ka fare seriozitet dhe sinqeritet në këto propozime”, tha ai.
Ai pati një thirrje për qytetarët për reflektim në zgjedhjet e ardhshme.
“Gjasat janë reale që Albin Kurti ia ka arritur qëllimit të vet që me dërgu vendin në zgjedhje. Iu ftojmë me reflektu që zgjedhjet, pavarësisht kemi provuar me evitu, zgjedhjet nënkuptojnë që ia japin qytetarit të drejtën me korrigju demokracinë në Kosovë. Është formulë e pastër që nëse një kastë politike s’ka ndjesi për qytetarin, sovrani ka të drejtën me korrigju. Të shohim çka po ndodh edhe pesë orë”, shtoi Gjini.
Gjini i bëri thirrje Kurtit që të votojë në lexim të dytë projektligjin për ndryshimin e ligjit për Gjykatën Speciale.
“Ne nuk dalim kundër këtij procesi, pasi mendojmë se Kosova është lënduar shumë nga Gjykata Speciale. Asgjë nuk i kushton LVV-së nëse thotë pa asnjë kusht e kalojmë ligjin për Specialen. Ky Projektligj ka mbetur për dhjetë ditë në sirtar pa asnjë arsye. Nuk kanë dashur me kalu që të kemi të qartë”, përfundoi ai.
