Ambasadori i Republikës së Kosovës në Francë, Lulzim Hiseni, ka dorëzuar letrat kredenciale te presidenti francez, Emmanuel Macron, në Pallatin Élysée.
Lajmin e ka bërë të ditur vetë Hiseni përmes një postimi në Facebook, ku ka ndarë edhe disa detaje nga ceremonia.
“Me krenari dhe emocion të veçantë i dorëzova letrat kredenciale Presidentit të Republikës Franceze, Emmanuel Macron, në Pallatin Élysée, në cilësinë e Ambasadorit të Republikës së Kosovës në Francë”, ka shkruar Hiseni.
Ai ka theksuar se përfaqësimi i Kosovës në Francë përbën një përgjegjësi të veçantë, ndërsa ka vlerësuar mbështetjen e Francës ndaj Kosovës ndër vite.
“Kosova mbetet thellësisht mirënjohëse ndaj Francës për angazhimin e saj në momentet kyçe të historisë sonë: nga Konferenca e Rambujesë te ndërhyrja e NATO-s, e më pas në rindërtimin e vendit tonë, forcimin e institucioneve dhe njohjen e pavarësisë”, ka deklaruar ai.
Hiseni ka thënë se Franca ka një rëndësi të veçantë edhe në rrugëtimin e tij personal dhe profesional, pasi në këtë shtet ka studiuar, punuar dhe ka ushtruar më herët funksione diplomatike.
Ai ka bërë të ditur se gjatë mandatit të tij do të angazhohet për thellimin e bashkëpunimit mes Kosovës dhe Francës në fusha të ndryshme.
“Do të angazhohem me të gjitha energjitë për të thelluar dialogun tonë politik, për të zhvilluar shkëmbimet ekonomike, kulturore dhe universitare, si dhe për të çuar përpara ambicien evropiane të Kosovës”, ka shkruar Hiseni.
Në fund, ambasadori ka theksuar se synimi i tij është forcimi i marrëdhënieve mes dy vendeve dhe afrimi i mëtejshëm i dy popujve./teve1.info/
