Deputeti i Aleancës, Ramush Haradinaj, ka kritikuar kryeministrin Albin Kurti lidhur me procesin e miratimit të Ligjit për Dhomat e Specializuara.
Në një konferencë të jashtëzakonshme për media, Haradinaj ka deklaruar se Kurti i ka dhënë, sipas tij, një goditje të rëndë Ushtrisë Çlirimtare të Kosovës (UÇK), duke e lënë në gjysmë ligjin për Specialen në një moment që ai e konsideron kritik.
“Ligji për Specialen nuk është i një partie, por i 91 deputetëve të kësaj legjislature që me nder e kanë votuar në lexim të parë. Është shumë e pandershme që të lihet në gjysmë ky ligj, duke e ditur rëndësinë e tij dhe momentin kritik për mbrojtjen e udhëheqësve të UÇK-së”, ka deklaruar Haradinaj.
Ai ka thënë se deputetët do të duhej të bashkoheshin dhe ta përfundonin procesin e miratimit të ligjit, duke theksuar se për këtë, sipas tij, janë zgjedhur nga qytetarët.
Haradinaj ka akuzuar Kurtin se ka futur në një situatë të vështirë si ligjin, ashtu edhe vendin.
“Kurti e kurthoi edhe ligjin edhe vendin. Kurti i dha një goditje të rëndë UÇK-së, duke e lënë në gjysmë ligjin për Dhomat e Specializuara në momentin më kritik”, është shprehur ai.
Deputeti i AAK-së ka kritikuar gjithashtu Kurtin për mundësinë që vendi të shkojë në zgjedhje të reja.
“I njëjti Kurti që tri herë para kësaj here i fitoi zgjedhjet dhe prapë e çoi vendin në zgjedhje. Kjo është hera e katërt që po e çon vendin në zgjedhje. I njëjti person, i njëjti vendimmarrës”, ka deklaruar Haradinaj./teve1.info/
