Deputeti i Lëvizjes Vetëvendosje,Vigan Qorrolli, përmes një postimi në “Facebook” ka bërë thirrje që gjatë ditës së sotme të votohet Presidenti dhe Projektligji për Specialen.
Ai tha se sot nuk është dita për ta çuar shtetin në prapakthim.
“Sot nuk është dita për ta çuar shtetin në prapakthim: e votojmë Presidentin dhe e votojmë Projektligjin për Specialen, sepse të dyja janë pjesë e të njëjtit detyrim — t’i japim vendit institucione funksionale dhe vendimmarrje”, tha ai përmes një postimi në “Facebook”.
Më tej ai tha se shkuarja në zgjedhje e lëndon Hagën dhe Republikën tonë.
“Shkuarja në zgjedhje e lëndon Hagën dhe Republikën tonë. Do t’i bini pishman nëse veproni me këtë mllef e maraz prej foshnjorakësh politik!”, shtoi ai.
Sot është dita kur përfundon afati për zgjedhjen e Presidentit të vendit.
Ndërkohë, gjatë ditës së djeshme u mbajt seancë e Kuvendit, në të cilën Projektligji për Dhomat e Specializuara u votua në lexim të parë. Megjithatë, procedura nuk vazhdoi me shqyrtimin në lexim të dytë dhe votimin e tij.
Në leximin e parë, në mbështetje të këtij Projektligji votuan deputetët e Lëvizjes Vetëvendosje, Partisë Demokratike të Kosovës dhe Aleancës, ndërsa deputetët e Lidhjes Demokratike të Kosovës nuk votuan pro.
