Roli i saj kryesor, është ta mbaj lumin brenda shtratit.
Por, një funksion të tillë, nuk po e kryen diga në lumin Mirusha.
Dëmtimet nga vërshimet, bën që uji të depërtojë përtej digës.
Kjo gjendje, ka shtyrë organizatën mjedisore “Ecopana” që të nis punën për heqjen e kësaj dige.
Krejt kjo, me synim rikthimin e rrjedhjes së lirë të lumit.
“Diga është në gjendje të rënduar fizike. Në strukturën e saj janë evidentuar çarje dhe probleme të stabilitetit, të cilat ngrenë shqetësime serioze për sigurinë e banorëve, sidomos gjatë prurjeve të larta. Ajo është ndërtuar pa pëlqim dhe pa lejet e nevojshme ujore e mjedisore. Për më tepër, nuk kryen më ndonjë funksion të dobishëm që do ta arsyetonte mbajtjen e saj. Studimet e kryera deri më tani (studime ekologjike dhe mjedisore, hidrologjike, statike, sociale, gjeomekanike) kanë treguar edhe ndikimin e saj në lumë: diga pengon rrjedhën, grumbullon sedimente dhe ndërpret lidhjen natyrore të habitateve ujore. Në pjesën e lumit të ndikuar nga diga është konstatuar cilësi shumë e ulët e ujit. Pra, heqja e saj është çështje e sigurisë së njerëzve dhe e rikuperimit të Mirushës”, thuhet nga kjo organizatë.
Nga kjo organizatë, thonë se në bashkëpunim me Ministrinë e Mjedisit dhe Planifikimit Hapësinor, po punohet për heqjen e kësaj pende.
Në rast se kjo realizohet, do të shënohej edhe rasti i parë në Kosovë i largimit të një dige.
Por, jo të gjithë pritet ta japin pëlqimin për largimin e këtij muri mbrojtës nga uji.
Iniciativa për heqjen e kësaj dige e cila ka pësuar disa dëmtime nga vërshimet, nuk është mirëpritur nga Komuna e Malishevës.
Nga kjo komunë, thonë se për gjithë këtë çështje u njoftuan përmes medieve.
“Ne si komunë nuk kemi asnjë njoftim zyrtar as nga Ministria e Mjedisit dhe Planifikimit Hapësinor, as nga organizata Ecopana tek e cila e pamë njoftim nëpër media që do të largohet diga në Liqenin e Mirushës. Për këtë rast ne i kemi pasur disa takime para dy viteve edhe me organizatën në fjalë edhe me institucione, mirëpo qëndrimi i komunës në këtë rast dhe i komunës është kundër largimit të digës në Mirushë”, u shpreh Avdi Morina –drejtor i Urbanizmit në Malishevë
Nga Komuna e Malishevës, thonë se kanë një zgjidhje tjetër për këtë problem.
“Ne jem të gatshëm që së bashku me Ministrinë e Mjedisit dhe Planifikimit Hapësinor të bashkëfinancojmë që kjo digë të rinovohet, të vendoset siguria, dhe normalisht duke i respektuar standardet dhe ligjet në fuqi. Na jemi për me i respektua, por jo me largu digën në atë mënyrë të njëanshme”,sqaron Morina.
Pas kësaj, Organizata “Ecopana” synon edhe heqjen e digës së dëmtuar të Kotradiqit në lumin Lumbardhi në Deçan.
