Nga të gjithë deputetët që ishin në sallë, përfshirë pozitën dhe opozitën, Kryetari i Kuvendit, Glauk Konjufca, ka bërë të ditur se kjo pikë u votua me 83 vota për, njofton Tëvë1.info.
Tutje, pas këtij votimi, përmes një postimi në Facebook ka reaguar edhe Ministri i Ministrisë së Mjedisit, Planifikimit Hapësinor dhe Infrastrukturës, Liburn Aliu.
Ai tha se qëllimi i këtij projektligji, është përcaktimi i procedurave dhe ndarja e kostove në mes dy vendeve për financimin, studimin e fizibilitetit dhe projektit për linjën hekurudhore.
Aliu gjithashtu bëri të ditur se kostoja totale për realizimin e Studimit të Fizibilitetit dhe hartimit të Projekt-Idesë për këtë linjë hekurudhore, parashikohet të jetë rreth 1,980,000 euro.
“Ministria e Infrastrukturës dhe Energjisë së Republikës së Shqipërisë do të ndaj shumën prej 1,000,000 (një milion) Euro, ose rreth 51% të kostos totale, ndërsa Ministria e Mjedisit, Planifikimit Hapësinor dhe Infrastrukturës së Republikës së Kosovës do të ndaj shumën prej 980,000 (nëntëqind e tetëdhjetë mijë) Euro, ose 49% të kostos totale. Kjo kosto është parashikuar në buxhetin e vitit 2022 të Ministrisë së Mjedisit, Planifikimit Hapësinor dhe me autorizim të Qeverisë së Republikës së Kosovës do të barten në buxhetin e Ministrisë së Infrastrukturës dhe Energjisë së Republikës së Shqipërisë, për bashkëfinancimin e realizimit të projektit”, thuhet tutje në postim.
