Po ua dorëzon një nga një pakot onkologjike, grave të cilat po përballen me kancerin e gjirit në QKUK.
Kështu, ushtruesja e detyrës së Presidentes, Albulena Haxhiu, po u ofron atyre përkrahje, në muajin që konsiderohet si “Tetori Rozë”.
“I bëj thirrje edhe sot çdo gruaje që kontrollin mos ta shtyjë për nesër. Pra që menjëherë të bëjnë kontrollat, mamografia është falas siç e dini, e po ashtu kërkojnë nga familjet e personave që preken nga kanceri i gjirit që t’i mbështesin ata sepse siç e përmenda shëndeti i tyre është shumë i rëndësishëm edhe për shoqërinë tonë por po ashtu edhe për institucionet e Republikës së Kosovës”, tha Albulena Haxhiu.
Pjesë e vizitës ishte edhe ministri i Shëndetësisë, Arben Vitia.
Ai tha se tash rastet e diagnostifikimit janë duke ndodhur në faza të hershme.
“Deri në fund të këtij viti, në stadin e parë dhe të dytë janë diagnostikuar 53.4% e grave me kancer të gjirit në fazën e parë ose të dytë. Edhe kjo natyrisht ju jep edhe shpresë e përmbi të gjitha ju jep edhe jetë sepse edhe dje e edhe sot këtu që ishim takuam edhe disa gra të cilat kanë përfunduar ciklin dhe tanimë e kanë mposhtur këtë sëmundje dhe kjo na bën që të jemi edhe më të vetëdijshëm, të vazhdojmë me këto fushata”, tha Arben Vitia.
Ndërkaq, drejtori i Klinikës së Onkologjisë, Ilir Kurtishi, tha se investimet e viteve të fundit kanë ndikuar në përmirësimin e trajtimit të sëmundjeve malinje në këtë klinikë.
“Vetë fakti që mbi 95-98% e të gjitha rasteve me sëmundje malinje të adultëve trajtohen në Klinikën e Onkologjisë si i vetmi shërbim publik, ose në anën tjetër 99% e shërbimeve onkologjike janë publike dhe gati 0.5% ose 1% privat tregon se me çfarë përkushtimi është bërë punë e jashtëzakonshme në Klinikën e Onkologjisë dhe me investime të cilat janë bërë nga institucionet shtetërore të Republikës”, deklaroi Kurtishi.
Kurtishi gjithashtu theksoi se në klinikën e Onkologjisë trajtohen edhe shtetas të vendeve fqinje.
