Organizatat e dala nga lufta e UÇK-së, dega në Drenas, kanë njoftuar se kanë vendosur të ndërpresin bashkëpunimin institucional me Komunën e Drenasit dhe kryetarin Ramiz Lladrovci.
Në njoftim organizatat thonë se vendimi vjen si pasojë e, siç pretendojnë ato, mungesës së vazhdueshme të bashkëpunimit, mbështetjes dhe përkrahjes nga institucionet komunale.
“Ne jemi të përjashtuar nga secili aktivitet, duke mos afruar asnjë bashkëpunim, asnjë ndihmë dhe asnjë përkrahje”, thuhet në njoftim.
Sipas organizatave, prej vitesh shoqatat e dala nga lufta nuk janë ftuar në aktivitete dhe mbledhje solemne për data të rëndësishme, përfshirë 17 Shkurtin, 5, 6 dhe 7 Marsin, si dhe 14 Qershorin – Ditën e Çlirimit.
Ato pretendojnë gjithashtu se kërkesat dhe nevojat e adresuara nga shoqatat e tyre janë refuzuar ose kanë mbetur pa përgjigje.
Në njoftim përmendet edhe mbështetja që, sipas organizatave, Komuna e Drenasit u ofron rreth 50 organizatave joqeveritare, ndërsa ato thonë se nuk kanë përfituar trajtim të ngjashëm institucional.
Organizatat kanë ngritur shqetësime edhe lidhur me, siç e përshkruajnë ato, “moslejimin dhe pengimin për shfrytëzimin e trojeve”.
Në fund të njoftimit, organizatat u kanë kërkuar falje familjeve të dëshmorëve, veteranëve, invalidëve të luftës dhe qytetarëve, duke theksuar se, sipas tyre, bashkëpunimi nuk mund të vazhdojë me një institucion që “në vend të mbështetjes, i pengon dhe i përjashton”.
Njoftimi është nënshkruar dhe vulosur nga përfaqësuesit e organizatave të dala nga lufta e UÇK-së në Drenas./teve1.info/
