Një grua nga Florida, Ivana Lisette Ortiz, po përballet me akuza të rënda pas sulmit të armatosur në shtëpinë e këngëtares Rihanna në Kaliforni.
Sipas akuzave të ngritura nga Prokuroria e Distriktit të Los Angeles, Ortiz përballet me një akuzë për tentativë vrasjeje, 10 akuza për sulm me armë dhe tri akuza për të shtëna me armë në një banesë.
Ngjarja dyshohet se ka ndodhur më 8 mars, kur Ortiz udhëtoi drejt shtëpisë së Rihannës dhe qëlloi disa herë me armë zjarri.
Në atë moment, Rihanna ndodhej në oborr së bashku me partnerin e saj, A$AP Rocky, ndërsa tre fëmijët e tyre ishin në dhomën e gjumit. Nuk raportohet për persona të lënduar.
Ortiz është deklaruar e pafajshme ndaj akuzave. Gjykata ka caktuar garancinë në 2.65 milionë dollarë, ndërsa seanca e radhës është caktuar për 29 tetor.
Në rast se shpallet fajtore për akuzat, ajo mund të përballet me dënim deri në burgim të përjetshëm.
