Dy persona janë arrestuar në Pejë nën dyshimin për kryerjen e veprave penale “Mbajtja në pronësi, kontroll ose posedim i paautorizuar i armës” dhe “Kanosja”.
Sipas Policisë së Kosovës, rasti ka ndodhur më 1 tetor, rreth orës 20:00, në rrugën “Kadri Bajri” në Pejë.
Policia është njoftuar për një mosmarrëveshje, ku dyshohej se ishin përfshirë disa persona. Njësitë policore kanë dalë në vendin e ngjarjes dhe kanë ndërmarrë veprimet e nevojshme hetimore.
Gjatë kontrollit te dy personat e dyshuar, policia ka gjetur dhe sekuestruar:
një pistoletë të llojit CZ;
një pistoletë të llojit Zoraki;
dy karikatorë;
17 fishekë të kalibrave të ndryshëm.
Pas intervistimit dhe përfundimit të procedurave policore, me vendim të organeve kompetente, të dyshuarit janë dërguar në mbajtje për 48 orë.
Rasti është duke u hetuar nga njësitë përkatëse të Policisë së Kosovës.
