Analisti Xhevdet Pozhari ka vlerësuar se deklarimi i kryeministri Kurti, që kandidati për president është Bekim Sejdiu, mbyllë mundësitë për diskutime me partitë tjera për ndonjë emër të ri.
Ai ka thënë se Kurti ka treguar që i qëndron mbrapa idesë së tij për një president konsensual.
“Kurti, duke e rikthyer emrin e Bekim Sejdiut dje në një farë forme i mbylli mundësitë e diskutimit me partitë tjera për kondita të reja. Kurti është treguar shumë konkret ku ka biseduar për çështjen e presidentit. Nëse është emri i z.Sejdiu që është arrit nga një marrëveshje me LDK-në, kjo tregon që z.Kurti qëndron mbrapa asaj kandidature, për tu zëvendësua kjo kandidaturë duhet ulur biseduar me partner potencial politik për të arritur te një emër tjetër”, ka thënë Pozhari në emisionin “Këndi i Debatit” në Tëvë1.
Ai ka thënë se sheh hezitim të LVV-së për të bashkëpunuar me PDK-në, sikurse që sheh hezitim të Aleancës për të bashkëpunuar me Vetëvendosjen.
Kurti të mërkurën tha se nga pikëpamja e LVV-së, Bekim Sejdiu mbetët kandidati për president.
Sejdiu ishte dal si emër për president nga marrëveshja LVV-LDK. Por pavarësisht marrëveshjes, 6 deputetë të LDK deklaruan se nuk do ta votonin.
Sejdiu më pas u tërhoq nga gara.
Kurti ka thënë se sipas pikëpamjes së LVV-së, kandidati për president mbetet Bekim Sjediu sipas marrëveshjes me LDK-në, duke shtuar se nuk ka emër të ri për momentin.
“E kemi kandidatit nga marrëveshja, është Bekim Sejdiu nga marrëveshja. Bekim Sejdiu është tërhequr ku marrëveshja është braktisur nga 6 deputetë të LDK-së. Ishte një vendim i kushtëzuar nga situata që u krijua. Nga pikëpamja e LVV ne kemi marrëveshje politike dhe unë besoj që duhet ta respektojmë atë. Nuk kemi emër të ri ose tjetër, nëse ky do të jetë rasti në të ardhmen do të njoftoheni”, ka thënë Kurti.
