Një person është arrestuar në fshatin Kabash të komunës së Vitisë, nën dyshimin për armëmbajtje pa leje, ka njoftuar Policia e Kosovës.
Njësiti i Hetimeve të Përgjithshme në kuadër të Drejtorisë Rajonale të Policisë në Gjilan, në bashkëpunim me autoritetet përkatëse dhe në zbatim të urdhëresës së Gjykatës Themelore, ka realizuar kontroll në shtëpinë dhe objektet përcjellëse të të dyshuarit.
Kontrolli është kryer nën dyshimin për veprën penale “Mbajtja në pronësi, kontroll ose posedim të paautorizuar të armëve”.
Gjatë kontrollit, policia ka gjetur dhe sekuestruar si prova materiale një armë të gjatë automatike të llojit AK-47, dy karikatorë me 47 fishekë të kalibrit 7.62×39 mm, një palë dylbi, 41 fishekë të kalibrit 9×19 mm, 24 fishekë të kalibrit 7.62×39 mm, tre boksa metali, një palë pranga, një çelës për pranga, një brisk si dhe tre fishekë të kalibrit 7.65×17 mm.
Pas intervistimit, me vendim të Prokurorit të Shtetit, i dyshuari është dërguar në mbajtje për 48 orë./teve1.info/
