Ish-nënkryetari i OVL-UÇK-së, Nasim Haradinaj, gjatë protestës së sotme në Prishtinë kundër aktgjykimit ndaj ish-krerëve të UÇK-së në Hagë, u ka bërë thirrje deputetëve të Kuvendit të Kosovës për bashkim, ndërsa ndërkombëtarëve u ka kërkuar që ta rikthejnë besimin e qytetarëve të Kosovës.
Haradinaj ka thënë se deputetët duhet të veprojnë të bashkuar dhe me përgjegjësi, ndërsa ndaj komunitetit ndërkombëtar ka shprehur kritika për mënyrën se si është trajtuar çështja e ish-krerëve të UÇK-së.
“Ju, 100 deputetët që jeni atje, secili me përgjegjësinë e vet, ju thërrasim për bashkim. Ndërsa për ndërkombëtarët, të cilëve iu besuam sepse na ndihmuan në luftën e UÇK-së, bashkë fituam, por na keni tradhtuar dhe kthena besimin”, ka deklaruar Haradinaj.
Ai ka theksuar se kërkesa e protestuesve, sipas tij, është drejtësia dhe zbardhja e krimeve, duke shtuar se Kosova ka institucione dhe profesionistë që mund të merren me çështjet e drejtësisë.
“Ne kërkojmë vetëm drejtësi dhe zbulim të krimeve patjetër, sepse shumë të tjerë po tentojnë ta keqpërdorin. Kosova ka ngritur institucione, ka njerëz profesionalistë që drejtësinë e çojnë në vend”, ka thënë ai.
Haradinaj u ka bërë thirrje ndërkombëtarëve që, sipas tij, të mos e trajtojnë rastin vetëm si çështje individuale./teve1.info/
