Lavdije Leci, vajza e të ndjerit dr. Lec Gradica, ka kërkuar drejtësi për katër ish-krerët e UÇK-së që po mbahen në Hagë, gjatë fjalimit të saj në protestën e së enjtes në sheshin “Skënderbeu” në Prishtinë.
Ajo ka deklaruar se lufta e UÇK-së ishte luftë për liri dhe se çmimi i paguar nga populli i Kosovës për lirinë vazhdon të ndihet edhe sot.
Leci ka theksuar se liria është një e drejtë themelore e çdo njeriu, duke kujtuar edhe babanë e saj, i cili, sipas saj, iu përgjigj thirrjes për t’iu bashkuar luftës me synimin për çlirimin e vendit.
“Ende po orvatemi t’i dëshmojmë gjithë botës se lufta e UÇK-së ishte një luftë e drejtë. Liria është e drejta themelore e çdo njeriu në botë. Ndërsa neve shqiptarëve na u desh të paguajmë aq shumë. Ky çmim duket aq i lartë sa neve po na kushton ende”, ka thënë ajo.
Duke folur për babanë e saj, Leci tha se ai, sikurse shumë të tjerë, iu përgjigj thirrjes së atdheut me synimin për lirinë e Kosovës.
“Duam drejtësi për familjet tona, duam drejtësi për çlirimtarët”, ka përfunduar ajo./teve1.info/
