U.D. e presidentes së Kosovës, Albulena Haxhiu, ka mirëpritur marrëveshjen e tetë subjekteve politike shqiptare nga Presheva, Bujanoci dhe Medvegja për të garuar me listë të përbashkët, “Koalicioni Shqiptar”, në zgjedhjet parlamentare të 25 tetorit në Serbi.
Përmes një postimi në Facebook, Haxhiu e ka cilësuar marrëveshjen si një vendim që, sipas saj, e vendos përfaqësimin e shqiptarëve të Luginës mbi dallimet partiake.
“Ky është një vendim i pjekur politik, që e vendos përfaqësimin e shqiptarëve të Preshevës, Bujanocit dhe Medvegjës mbi çdo llogari partiake”, ka shkruar Haxhiu.
Ajo ka përmendur edhe çështjet që, sipas saj, prekin shqiptarët në Serbi, përfshirë pasivizimin e adresave, mosnjohjen e diplomave dhe përfaqësimin në institucionet publike, si dhe çështjet e arsimit, përdorimit të gjuhës dhe zhvillimit ekonomik.
Haxhiu ka theksuar se shqiptarët në Serbi nuk kanë ulëse të garantuara në parlament dhe se përfaqësimi i tyre varet nga rezultati zgjedhor.
“Në këto rrethana, bashkimi është i domosdoshëm. Ndarja e votave mund ta dobësojë përfaqësimin e Luginës, ndërsa një listë e përbashkët e forcon atë”, ka deklaruar ajo.
Në fund, Haxhiu ka thënë se institucionet e Kosovës do të vazhdojnë të kërkojnë respektimin e të drejtave të shqiptarëve në Serbi dhe u ka uruar sukses kandidatëve të listës së përbashkët në zgjedhjet e 25 tetorit.
