Një metër dru në Kosovë aktualisht po shitet nga 55 euro deri në 60, ndërsa paralajmërohet edhe për rritje e me të mëdha të çmimeve.
Kosovarët mund të paguajnë deri në 80 euro një metër dru këtë vit.
Tregtarët thonë se çmimet janë rritur për shkak të rrethanave të krijuara.
Ardian Musa, i cili bashkë me të atin ka disa vite që merret me këtë veprimtari tregon arsyet se pse është ngritur çmimi i druve.
“Me punën e drunjve merrem afro 20 vite, këtë vit çmimet janë shumë ekstrem kanë hyp dmth se ashtu është gjendja, krahasim me vitin e kaluar kanë qenë 45 euro metra e drunjve qarr e bung ndërsa ahi 40 euro, kurse këtë vit 60 është metra e drunjve qarr e bung ndërsa ahi është 55 euro. Ka të interesuar por kur të vinë myshteria ankohen se shtrenjtë dhe nuk kanë mundësi”, thotë ai.
Këto çmime janë shqetësuese për qytetarët.
Sherefedin Dedinca tregon që gjatë dimrit ngrohet me drunj e qymyr.
E këtë e brengos goxha ngritja e çmimit të drunjve.
“Ne këtu ne fshat furnizohemi me dru dhe me thëngjill pothuajse i tërë fshati dhe deri më tani ka qenë 25 euro metra e drunjve dhe dëgjova qe do të shkojnë çmimet deri 80 euro dhe është e papërballueshme”, thotë ai.
“ Sot në verë janë të papërballueshme çmimet, kurse në dimër qe do të shtrenjtohen edhe më shumë po askush nuk po interesohet as për popullin dhe as për klasat punëtore”, thotë Avdi Limani.
Kronika e realizuar nga Lendrina Kodrolli
