Protesta kundër vendimit të Dhomave të Specializuara ndaj ish-krerëve të Ushtrisë Çlirimtare të Kosovës po vazhdon edhe sonte në Prishtinë.
Për të shtatën natë me radhë, mijëra protestues janë mbledhur në sheshin “Skënderbeu” për të kundërshtuar vendimin e Dhomave të Specializuara, me të cilin katër ish-krerët e UÇK-së janë dënuar me gjithsej 81 vjet burgim.
Me pankartat “Jo në emrin tim”, “Në emër të popullit shpallen të pafajshëm” dhe “Liria ka emër”, si dhe me flamuj kombëtarë dhe flamuj të UÇK-së, protestuesit po kërkojnë drejtësi për katërshen e UÇK-së.
Në protestën e organizuar nga platforma “Liria ka emër”, po marrin pjesë qytetarë të shumtë, pavarësisht përkatësive të tyre politike.
Në mesin e të pranishmëve janë edhe familjarë të ish-krerëve të UÇK-së, përfshirë Altin Krasniqin, djalin e Jakup Krasniqit, dhe Klestor Veselin, djalin e Kadri Veselit.
Ndryshe, protesta kundër aktgjykimit të Gjykatës Speciale janë organizuar ditëve të fundit edhe jashtë Kosovës.
Tubime janë mbajtur në Gjermani, Zvicër, Austri dhe Kanada, ndërsa kundërshtime ndaj vendimit janë shprehur edhe nga diaspora shqiptare në vende të tjera.
Më 16 shtator, trupi gjykues i Dhomave të Specializuara e dënoi Hashim Thaçin dhe Jakup Krasniqin me nga 25 vjet burgim, Kadri Veselin me 18 vjet dhe Rexhep Selimin me 13 vjet burgim, respektivisht me gjithsej 81 vjet.
Ata u shpallën fajtorë për një numër krimesh lufte, ndërsa u shpallën të pafajshëm për akuzat për krime kundër njerëzimit.
Tani pritet që mbrojtja të dërgojë çështjen në Apel./teve1.info/
