Instagram ka prezantuar një funksion të ri që u jep përdoruesve më shumë kontroll mbi pamjen e profilit të tyre.
Me përditësimin e ri, përdoruesit mund të zgjedhin që postimet në të cilat janë etiketuar nga persona të tjerë të shfaqen edhe në rrjetën kryesore të profilit, krahas postimeve të publikuara prej tyre.
Deri tani, fotografitë dhe videot ku një person ishte i etiketuar shfaqeshin vetëm në seksionin e veçantë “Tagged”.
Tashmë, përdoruesi mund të vendosë nëse dëshiron t’i përfshijë ato edhe në profilin kryesor.
Postimet nuk shtohen automatikisht.
Përdoruesi duhet t’i miratojë manualisht dhe mund ta bëjë këtë nga njoftimi në DM, përmes menusë me tre pika në postimin ku është etiketuar ose duke mbajtur të shtypur fotografinë në seksionin e etiketimeve.
Një tjetër detaj i rëndësishëm është se kjo nuk krijon një kopje të dytë të postimit. Përmbajtja mbetet në profilin e personit që e ka publikuar fillimisht.
Nëse përdoruesi ndryshon mendje, ai mund ta largojë postimin nga rrjeta kryesore në çdo moment, pa hequr etiketimin dhe pa ndikuar te postimi origjinal.
Me këtë ndryshim, Instagram u jep përdoruesve mundësinë ta përdorin profilin si një hapësirë më të kuruar, ku mund të shfaqin edhe fotografi me miq, bashkëpunime apo momente të rëndësishme, pa pasur nevojë t’i ripostojnë ato.
