Ambasadori i Gjermanisë në Kosovë ka reaguar pas shpalljes së aktgjykimeve nga Dhomat e Specializuara të Kosovës në Hagë në rastin kundër Hashim Thaçit dhe të tjerëve.
Në deklaratën e tij, ambasadori gjerman ka theksuar se procesi gjyqësor kishte në qendër akuzat për krime lufte dhe krime kundër njerëzimit, duke nënvizuar se çështja nuk kishte të bënte me Ushtrinë Çlirimtare të Kosovës si të tillë apo me synimin e saj për pavarësinë e Kosovës.
Gjermania, sipas tij, e ka mbështetur vazhdimisht punën e Dhomave të Specializuara, duke e konsideruar atë të rëndësishme për trajtimin e krimeve të luftës dhe krimeve kundër njerëzimit, forcimin e sundimit të ligjit dhe afrimin e Kosovës me Bashkimin Evropian.
Ambasadori ka vlerësuar gjithashtu se Kosova, përmes themelimit të Dhomave të Specializuara dhe bashkëpunimit me Tribunalin Penal Ndërkombëtar për ish-Jugosllavinë (ICTY), ka dëshmuar se përmbush përgjegjësinë e saj për trajtimin e krimeve të luftës.
“Ky aktgjykim në asnjë mënyrë nuk i përjashton aktorët jugosllavë nga përgjegjësia për konfliktin e armatosur dhe shkeljet masive të të drejtave të njeriut të kryera kundër popullsisë në Kosovë në fund të viteve ’90”, thuhet në deklaratë.
Sipas ambasadorit, këto krime tashmë janë hetuar nga gjykatat ndërkombëtare dhe kanë çuar në ndërhyrjen e komunitetit ndërkombëtar.
Në fund, ai u ka bërë thirrje të gjitha palëve që ta respektojnë aktgjykimin dhe të respektojnë dinjitetin e viktimave.
Ndryshe, Specialja të mërkurën dënoi me nga 25 vjet burgim Hashim Thaçin e Jakup Krasniqin për krime lufte, me 18 vjet burgim Kadri Veselin e 13 vjet Rexhep Selimin. /teve1.info/
